Sunday, November 8, 2009

AIDS zawtnak a ngeimi pawl U.S ram luhter lo ding timi phunglam Obama nih a let

Kum 22 chung an hmanmi HIV rungrul a ngeimi pawl ram chung luhter lo ding timi phunglam cu hmai kum thokin U.S ram nih kan hmang ti lai lo, tiah U.S Ramhun Barack Obama nih Cawnninga ah a thanh. Bush cozah chan lio in an rak thok cangmi cu phunglam let ding cu Cawnnikhat thokin hmunter a si cang lai, tiah Obama nih a ti. Ramchung luhnak (visa) sawknak le green card sawknak caah AIDS zawtnak a ngeimi pawl khapmi phunglam cu vawlei cungah U.S telh in ram 12 nih an hman. Obama nih, “Vawleicung HIV/AIDS dohnak ah hruaitu si kan i tima si ahcun hi thil hi kan tuah hrimding a si,”tiah Ryan White HIV/AIDS timi cawlcanghnak ca minthut lai ah a chim. Ryan White HIV/AIDS timi cawlcanghnak cu 1990 ah an rak thokmi a si i tangkalut tlawmte lawng a ngeimi innchungkhar pawl ca siiai, i thlopnak le i zohkhenhnak ca a tuanmi a si. Cu cawlcanghnak cu kum 13 a rak si lioah thi rawhnak in HIV rungrul aa chawnmi Indiana hngakchia pate min lakin an rak thok. Ryan White cu amah bantuk vanchiat a tongmi pawl ca le AIDS zawtnak ralrin ding hrihhawhnak caah pumpek in a rak cawlcang i kum 18 a si,1990 April thla, ah a nunnak a rak liam. Obama nih min a thutnak ah cu pate a nu zong a rak kai kho i, Congress upa pawl le HIV ca a cawlcan gmi pawl zong an rak kai ve. HIV rungrul karh hram a rak i thok, 1987, ah U.S Department of Health and Human Services nih HIV rungrul cu i chawn khawh a si, zawtnak a ngeimi pawl cu U.S ram chung luhter lo ding tiah phunglam a rak chuahpi. Cu rammi pawl ngandamnak zohkhenh bu nih 1991 ah cu phunglam cu let than aa tim nain congress upa pawl nih an duh ti lo. Phunglam ningin HIV zawtnak a ngeimi sianghngakchia, ramleng khualtlawn le ralzam tampi cu U.S ram chung luhnak nawl khap dih an si i zawtnak a ngeimi hngakchia pawl cawm a duhmi pawl zong cawmnak nawl pek lo a rak si. 1993 thokin U.S ram ah HIV he aa pehtlaimi i tonnak pawl zong an tuah ti lo. Aruang cu HIV zawtnak a ngeimi cawlcanghtu pawl le hlathlaitu pawl kha U.S ram chung luhnak nawl an ngei ti lo caah a si. U.S ram ah HIV/ AIDS a ngeimi minung nuai khat leng an umi kum khat ah 56,000 an i chawn tiah ruah a si. Atu ah, AIDS zawtnak a ngeimi minung pawl ram chung luhnak nawl a khapmi ramhna cu: Armenia, Brunei, Iraq, L i b y a , M o l d o v a , Oman,Qatar, Russia, Saudi Arabia,Thlang Korea le Sudan ram an si.– AP(Ref:: SeiH401)

No comments: